好好笑

美國睇戲，十大元一張門票，加稅要十一二蚊，衰衰地都可以食到餐晏仔，合乎經濟原則的做法，就係連睇兩齣戲，係就係辛苦，但如果得閒，都算係一種娛樂。禮拜二有人請睇試映場，老蓮咁遠走到林肯中心果頭，係一間設有I-MAX的戲院放映，電影係Death Race，集正邪暴力速度於一身的爆谷片，講班監躉俾人控制，參加死亡賽車，邊個隊冧對手，邊個重獲自由，主角係大隻佬Jason Statham。好此道者，不可錯過。

睇完Death Race之後，意猶未盡，精神有夠飽滿，踩多一場，係喜/鬧劇Tropic Thunder。此片可謂笑片中既滿漢全席，將同期上映的另一部笑片Pineapple Express比下去，皆因本片的內容極度踩界，大量粗口橫飛，衛道人士切免入場，否則有損自尊，閣下自理。有道德塔利班發起抵制行動，大罵內容歧視不同種族、智障人士，叫人罷看此片，這伙人行為幼稚，做事唔經大腦，不用多理。

所謂喜劇之盛宴，主人家Ben Stiller請來各方好友，鼎力相助，Jack Black不用多介紹，Robert Downey Jr.扮完鐵甲人之後，今次白人扮黑鬼，每次出場都搶爆鏡。觀眾亦都可以睇到湯告魯斯爆笑既演出，在此不便透露，要落足眼力睇。一部喜劇之成功，全賴演員既投入，Tropic Thunder 台前幕後好似曼聯隊波，前中後各施已職，無話斷欖，想像得到在拍攝過程裡面，他們都樂在其中。演員進入了忘我境界，甚至忘記了自己。齊集成班癲人，他們的演出令到觀眾們由頭笑到尾，完場時齊齊鼓掌，向那些製造快樂的人說聲多謝。