怪誕城

城內住有百萬人，見鬼O哂嘴，見人潛落水，為數也不少。他們躲一角，見光會工作，日日搵命搏；入夜靠邊站，落D唱K食兩番，喪膽喪屍齊喪玩。不過他們有愛心，彼邦發生大地震，眼見孤兒壓廢墟，出錢賑濟救國人。地理處於熱氣候，有人為情去跳樓，有人移民要暴走，壓力壓住了膊頭，皆因好難出到頭，只求，只求，只求天公把我來打救。

光怪陸離咩都有，靚妹走去做援交，靚仔自閉玩口爆，試問先生點樣教﹖野蠻任性小公主，抽脂溶脂要減肥，不懂洗衫煮飯和掃地，郁D唔岩發老脾.......小姐，靚與唔靚係睇心地﹗買碗六寶飯，扮哂大支野，講明無墨魚，又要發爛渣，拍片放上網，有架自已丟。

不過講句真，怪誕事情常發生，實在唔洗太認真。家下心情很平靜，舉頭放眼望繁星，眨眼轉了三年情，回頭想起怪誕城......

香的屁

很多朋友都說〈Juno〉好睇，原因很多，不在這贅述，鹹濕仔覺得〈Juno〉故事簡單，橋段老土，悶場頗多，讓人看得昏昏欲睡。坊間讚譽之聲多向Ellen Page而來，這個女孩的演出太搶鏡。不過，〈Juno〉的編劇Diablo Cody小姐才是電影的靈魂，這位風塵女子曾當過豔舞女郎，手臂上紋有性感女郎的圖案，在奧斯卡獲最佳編劇時亮相，自在愜意不做作，比其他大明星更具風彩。她的劇本細膩自然，對世情動察入微，片中生活化的對白，讓人難忘。在此quote一個場口。

Juno: 我好似對人性失去信心。
Dad: 得唔得講白d呀?
Juno: 我剩係懷疑....兩個人可唔可以永遠係埋一齊。
Dad: 你講緊兩公婆呀?
Juno: 係呀，就好似一對戀人咁。
Dad: 你唔係話我知你有感情問題呀? 喂，講真你大緊個肚就唔好攪攪震。
Juno: 唔係呀，老豆。
Dad: 你咁做真係有d噁心喎。
Juno: 夠啦。
Dad: 做咩呀? 你食錯藥呀? 定係飲大左?
Juno: 錯哂呀。我剩係想知兩個人可唔可以永遠開開心心咁係埋一齊。
Dad: 我敢寫包單，一定唔簡單。自已知自已事，同你後母都係埋一齊十年，我地都生活得幾開 心。拿，我認為你最好可以搵到一個，無論你變成點都會愛你既人，無論你開心、傷心、樣衰、 樣靚，就算點都好，佢都仍然覺得你放既屁係全世界最香既，咁呢個就係值得你廝守一生的 傻仔。
Juno: 哦，我唸我已經搵到佢。
Dad: 無錯，果個人咪就係你老豆o羅，無論天跌落黎，老豆都會係你身邊支持你。
Juno: 老豆，我出一出去，好快番。
Dad: ok，你豈豈講果個人，係唔係你老豆呀?
Juno: 哦....嘿....嘿.....

無錯，愛一個人，連佢放既屁都會覺得香。

無親節

明知花鋪在母親節掠水，都要買枝康乃馨送給媽，心裡面很愛媽，口裡總說不出來，所以要用康乃馨表心意，媽見到接近枯萎的康乃馨，都會口不對心地，說「衰仔，又亂咁洗錢，下年唔駛買啦。」阿妹通常會搭嗲，提高嗓子說「肥媽，枝康乃馨謝過謝賢，你個乖仔又俾人握錢啦。」媽的好，不是其他人可比。每天見面的日子，不懂這道理，飄洋過海後，才明白媽做的一切，都是為了仔女好。

雖然記性唔好，不過很記得一件小事。有一次周杰倫開演唱會，一票難求，那時無知的我通宵排隊，還記得那晚寒風凜烈，衣衫單薄的我，想去便利店買枝熱維他，驚走左之後要由頭排過，所以用左手抱右手取暖，凍了一整晚。終於等到日出，不過仲有一個鐘就返學，唔想逃學，但又要買飛。於是打電話返屋企，叫媽幫我買飛，媽叨嘮了兩句，說「死仔包，讀書唔見你咁積極。」就這樣，媽就晨咁早幫我排隊兼買飛。

不久之前，手提電話報銷，換了號碼，媽打不通舊的號碼，生怕兒子在外出事了，便打鑼打鼓，致電在美國的全部親朋戚友，差點就要打九一一報案，叫美國警方出動聯邦刑警千里尋子。媽，下次我會有交帶了。