笑餐飽

除了恐怖變態核凸片之外，咸濕仔都鐘意睇無聊混帳攪笑片，在周星馳減產、王晶扮正經、鄭中基乾塘之際，港產鬧劇買少見少，翻看了〈咖哩辣椒〉及〈東成西就〉，笑到血脈加速流動，眼水直標。

荷里活的喜劇離不開青春、愛情、運動等類型，不過好似〈40-year-old virgin〉這樣就有點怪雞，踢開浮誇的嘩眾取寵，兩個半小時的笑片，由頭笑到尾。Steve Carell係新一代白人笑匹，扮演一個鐘意收藏模型公仔，多過同女人上床的四十歲處男Andy仔，不過身邊的騎呢同事，齊齊唸計幫佢搵個女人破處。過程攪笑過癮，殘酷真實，成班豬朋狗友叫Andy仔做個真正的男人，夾左佢去做body waxing，幫佢起清心口的胸毛，重振雄風，剃到咁上下已經頂唔順，個口心一半有毛一半空白。有大量對白十分抵死精警，Andy仔話愛情唔一定要有性，講左以下一句說話 “You know how when you grab a woman's breast... it feels like... a bag of sand. ”

〈Knocked Up〉講未婚先有子。男主角係一個又肥又賤、不務正業、隊草爛口、製作緊咸網的阿Ben。女主角係樣靚身材正、生活正常、收入穩定、事業有成的Alison。兩個九唔搭八的人，在酒吧飲大兩杯，玩完一夜情之後，竟然發現攪大左個肚。Alison同阿Ben由最初拒絕接受現實，因誤解鬧交，到後來一齊承擔責任，整個過程十分有趣。此片全長兩粒鐘，對白攪笑，演員生鬼，係美國今年一個小小的Sleeper Hit。

人地話猶太人好有腦，咸濕仔就覺得佢地係最多口水的一個民族。猶太仔製片Judd Apatow，快手快腳，帶住同一班演員，同年拍左一部笑爆咀的青春片〈Superbad〉，講一肥一瘦好似大雄同技安的老死，中學畢業進入不同大學之前，準備一場荒唐的派對，點知頭頭碰著黑，未成年想學人買酒，要偽造身份證，改名做“McLoving”；機緣際遇，肥仔去左一個大人派對偷酒飲，與火辣女郎大跳貼身舞，點知女郎咁豈姨媽到，在肥仔的大脾留下了一片紅。〈Knocked up〉中的阿Ben在片中客串傻更自大白人差佬，真係估佢唔到。中學畢業前，個個都係傻更更，笑哈哈就一日，〈Superbad〉無講什麼大道理，就是這樣無厘啦更才算青春。

無玩屎尿屁一樣可以笑餐飽，哈哈哈。